火星下的小金星

小金星:

最近有幸 PCMarket邀請訪問你爸爸對iPhone的意見，因為現在用緊部softbank WM6 + 3G用得幾好，雖然間中hang 機，但用緊3G 傳送再用番EDGE 相信大部份用過 1.5M boardband 叫佢用番 56K modem 都唔會好多人會學得正，所以就話部iphone值三千好啦，下年到佢響亞洲區發售時希望有埋3G啦!

小金星，查實你爸爸咁大個仔都有幾次搞野搞到見報之經驗，而第一次記得係好多年前(30年前?)，竟然搞左單野上歡樂今宵，當時都唔敢話比人聽係我搞出來的，到現在才敢講下……

話說我樓下有間小童群益會的圖書館，細個果時成日走去圖書館玩，當時10歲左右，參加了某D興趣小組要做標本，要去買針筒去將防腐濟注入果D小昆蟲度，走去藥房買當時值HK$1的針筒，對於小朋友來講呢$1 就係現成的玩具，可以做手提水槍，當時最好玩的係用水射落樓下，用針筒射水落街有幾種不同玩法，視乎你有什麼物資在手，只係水都分 冰水、暖水、熱水及室溫下的水。當然在下都只係試過冰水同室溫的水，假如閣下當年行過某處感到涼一涼或成身濕晒或D 液體發出一D 不明或知名之氣體，一定與本人無關….

針筒射水其實有兩種玩法，分 神不知鬼不覺式與練神槍手式兩種: 神不知鬼不覺式係因為用上針頭射出，對受害者來講往往以為係落微雨，所以往往只係摸下個頭，望下個天就算。這種方式還要計算炮彈射出與到達地面之時間，及移動之速度，新手往往需要一些時間去練習，但唔緊要，這是熟能生巧的行為，當年未有wii就只好人肉練習一下。

而 除了從針筒射水之外亦可除掉針頭 作高速發射，而這亦需要配合天氣，及更準確之眼界。每當下雨天時target 從兩旁進下射程後，便可以45度角高速射向目標，由於時為下雨天，目標多數未能了解自已為何濕身。

本文無鼓吹推動 針筒射水之玩意，有意練眼界者可按此

 玩了一排這種迷你水槍之後，最大鑊的就係某日從地下執到……

一粒淺藍色氣槍子彈，這種飛彈型的子彈的口徑，原來與針筒的SIZE相同，亦可透過氣壓射出高速子彈。

就係咁樣一支經濟，高移動及可通過金屬探測器之氣槍便出現了。雖然第一版本發出之子彈未能射穿電話簿，連環發射亦未有，但屬於窮人的汽鎗面世了。而當年未有internet，所以從一班小朋友傳到另一班小朋友，再傳到整個香港要一段時間，而到最後當然就黃左，上了歡樂今宵之香港人香港事。

唔知大家知唔知 香港人香港事 係乜野環節，其實係每星期找一個題目，如 唔好 放隻”旭”下”旭”的手型汽車飾物響車尾，然後每個廣告前就整個jingle 叫你唔好之類。

所以成個星期就叫D小朋友唔好玩 針筒氣槍，亦搞了我成個星期，令我呢個針筒氣槍發明人唔敢再研究version II，唉! 小金星，如果唔係可能你爸爸都有機會有粒星星叫做小金星老頭呢！ Hee hee

小金星你要努力研究，遲早有粒星係你的。

 (注意：請勿使用棄置之舊針筒，及小朋友注意針筒安全)